Почна изградбата на ТИРЗ „Виница“

Почна изградбата на ТИРЗ „Виница“ која се простира на површина од 21 хектар, составена од 10 парцели. Се наоѓа на само два километра од Виница, пет километри од Зрновци, 10 километри од Кочани, 115 километри од аеродромот Александар Велики во Скопје и 160 километри од граничниот премин Богородица.

На поставувањето на камен-темелникот присуствуваа премиерот Никола Груевски, вицепремиерот Владимир Пешевски, министерот за економија Беким Незири, директорот на Дирекцијата за ТИРЗ Виктор Мизо и градоначалникот на Виница Емил Димитриевски.

Зоната, како што истакна премиерот Груевски, ќе има и соодветен патен приклучок, а од особена важност ќе биде изградбата на автопатот Скопје – Штип, експресниот пат од Штип до Кочани и натамошниот развој на патната мрежа во овој дел од земјата, меѓу кои и надградбата на магистралниот пат што води до Делчево.

– Со сите овие предуслови немаме причина да не веруваме дека оваа зона ќе биде успешен проект и во своите рамки ќе вдоми повеќе нови фабрики во овој регион. Тоа ќе значи нови работни места, заживување на регионот и подобар животен стандард за бројни наши сограѓани кои својата егзистенција ќе ја имаат во оваа зона, рече Груевски.

Владата со своите тимови, вети премиерот, ќе продолжи напорно и активно да работи на подобрување на инвестициската клима и промоции во други држави за изградба на зоните во државата и изградба на патиштата и локалната инфраструктура и се што е потребно за привлекување повеќе инвеститори и отворање повеќе работни места.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.