Хисени: Косовските власти им плаќале на држави за да го признаат како независно

Поранешниот шеф на косовската дипломатија, Скендер Хисени, изрази сомневање дека одредени признавања на Косово се издејствувани со поткуп.

–       Косово не треба и не смее да се гради на невистинити и фалсификувани претпоставки како што се разни ветувања за инвестициска помош – изјавил Хисени.

Тврдењето на Хисени го негираа косовските власти, а заменик-премиерот Мимоза Кусари Љиља рекла дека неговата изјава е штетна за Косово.

–       Косово нема фондови да ја корумпира државата за да биде признаена – рекла Кусари.

Сомневањата на Хисени се дека во некои земји, во кои биле високи функционери на косовската влада, биле правени разни трансакции за да обезбедат признавање на Косово. Неговиот став е дека лобирањето треба да биде „совршено чисто“.

–       Загрижен сум поради поединечни изјави дека дури и заменик-премиерот и министрите, понекогаш, да кажеме во африканските земји, се обиделе да направат разни трансакции во кои било вклучено и признавањето на Косово,  преку различни инвестиции или купување компјутери… – изјавил Хисени.

Косово досега е признаено од 90 земји, меѓу кои и 22 земји-членки на ЕУ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.