Термални проверки на патниците на скопскиот аеродром (ВИДЕО)

На аеродромот Александар Велики денеска е мирно, без тензии, во пресрет на враќањето на аџиите од Саудиска Арабија.

Медицински тимови се распоредени на аеродромот и вршат 24-часовни дежурства. Тие на секој начин се вклучени во детекцијата на евентуално заболени од болести што ги нема кај нас , а меѓу нив е и опасната ебола. Сите патници што влегуваат на аеродромот минуваат низ термална камера, која ја мери нивната температура.

– Нашата работна задача се состои во дежурства на аеродромот Александар Велики во три смени, наутро, попладне и ноќна смена. Доколку термалната камера регистрира покачена телесна температура повисока од 37, 5 го повикуваме пациентот, го седнуваме и му земаме податоци од која земја доаѓа и мериме температура – вели дежурната докторка од Здравствен дом – Скопје.

Таа објаснува дека доколку  проверката покаже покачена температура повисока од 37, 5 степени, дежурната служба ги известува колегите од тимот што работи на аеродромот и се преземаат натамошни превентивни мерки за таквите пациенти.

Доколку  пациентите кажат дека доаѓаат од ризичните подрачја во кои веќе постојат случаи и починати од ебола, тогаш од нив се земаат телефони за контакт и се испраќаат до службите на Министерството за здравство, кои ги преземаат сите мерки што треба да се спроведат.

ФОТО: Ѓорѓи Личовски

ВИДЕО: Жан Лековски

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.