Според британските здравствени власти, мала е веројатноста починатиот во Македонија да имал ебола

Претставници на англискиот Завод за јавно здравје велат дека е мала веројатноста смртта на нивниот државјанин во Македонија да е предизвикана од ебола и покрај сличните симптоми.
– Заводот за јавно здравје на Велика Британија е свесен дека постои непотврден извештај за британскиот државјанин што почина во Македонија, кој можеби имал слични симптоми на ебола. Ние сметаме дека е мала веројатноста ебола да е причина за смртта, но ќе ја продолжиме соработката со партнерите во истрагата – изјави доктор Брајан Меклоски од Заводот за јавно здравје на Англија, пренесуваат „Индипендент“ и „Телеграф“.
Педесет и осумгодишниот Британец почина вчера попладне на Клиниката за инфективни болести во Скопје. Тој престојувал во еден скопски хотел, а попладнето во лоша здравствена состојба бил пренесен на Инфективната клиника, каде што набргу починал. Во болницата веднаш се преземени сите безбедносни процедури, а персоналот што имал контакт со починатиот е ставен во карантин. Во карантин се и вработените и лицата во хотелот каде што престојувал британскиот државјанин.
Доктор Јованка Костовска, претседател на Комисијата за превенција на заразни болести, синоќа изјави дека засега не може да се потврди дали станува збор за ебола или за друга болест.

– Тоа треба да го покажат тестовите од обдукцијата и од анализата на примероците од пациентот што ќе бидат направени во Германија – рече Костовска.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.