Коцијанчич: Постигнувањето компромис е во интерес и на Белград и на Приштина

Дијалогот меѓу Белград и Приштина влегува во клучна фаза и во интерес и на двете страни е да се постигне компромис, изјави денеска Маја Коцијанчич, портпаролка на високиот претставник за надворешна политика и безбедност на ЕУ, Кетрин Ештон.

– Нема многу време за компромис. Тоа го знаеме и ние и премиерите на двете земји. Дијалогот е во клучна фаза која сè уште е во тек, а ние работиме на остварување напредок – нагласи Коцијанчич пред почетокот на денешната средба на Ештон со премиерите на Србија и на Косово, Ивица Дачиќ и Хашим Тачи во Брисел.

Коцијаничич потсети дека Европската комисија кон средината на април ќе поднесе извештај за текот на дијалогот, по што Европскиот совет ќе реши дали на Србија ќе ѝ додели статус на држава-кандидат за членство во ЕУ.

Главна тема на денешната средба меѓу Ештон, Дачиќ и Тачи, која почна околу 14 часот, е формирањето заедница на српски општини во Косово. Пред тројната средба се одржаа одвоени разговори на Ештон со двајцата премиери.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.