Заврши анкетата на Министерството за транспорт и врски на која граѓаните можеа да гласаат за вкупно пет идејни решенија за плажа на Охридско Езеро во општина Дебарца, кои пристигнаа на конкурсот за изработка на идејно архитектонско – урбанистички решенија за уредување плажата, објавен од Министерството за транспорт и врски.
Согласно резултатите од електронското гласање, од вкупно 3.072 гласови, идејното решение бр.1 доби 21% од вкупниот број на гласови, идејното решение бр.2 доби 14% од вкупниот број на гласови, идејното решение бр. 3 доби 56% од вкупниот број на гласови, идејното решение бр. 4 доби 7% од вкупниот број на гласови, а идејното решение бр. 5 доби 3% од вкупниот број на гласови.
Сите идејно архитектонско – урбанистички решенија за уредување плажи можеа да се видат на интернет страницата на Министерството за транспорт и врски www.mtc.gov.mk
Во наредниот период Министерството за транспорт и врски ќе донесе Решение за доделување на награда, како и за исплата на трошоци за останатите идејни решенија.
Проектот се однесува на уредување на една плажа на дел од Охридското езеро која се наоѓа во непосредна близина на Аеродромот “ Св. Апостол Павле-Охрид” на територија на општина Дебарца.
Целта на проектот е да се овозможи користење на водената површина како и можност за рекреација на предметната локација со што ќе се овозможи континурано користење на истата преку текот на целата година. Плажата е предвидена да се изгради согласно највисоките туристички стандарди а особено внимание ќе се посвети да не се наруши еко-интегритетот на околината.
Концептот на заштитата на природната средина и зачувување на автентичноста на некои од обележјата, кои се јавуваат како специфични за тој регион, при изработка на архитектонско-идејното решение беше основно начело што се бараше на конкурсот.
Предвидено е на плажата да има планирана песочна површина која би се изнивелирала и попесочила со соодветен автохтон песок, да се почитува постојното зеленило и да се дооформи со автохтони видови, хортикултурно и партерно да се уреди со поставување клупи, фонтани за питка вода, пешачки патеки од монтажно – демонтажни материјали.
Сервисниот пункт треба да има шанк со кабина за музика со спецификација на опрема, место за озвучување, санитарен јазол, тушеви, соблекувални, прирачна остава за чадори, лежалки и други реквизити. Треба да биде обележан просторот за капење во езерото заради заштита на капачите од пловни објекти и да се предвиди место за служба за спасување, а местото за седење на спасителот да се осмисли во духот на целата плажа. На плажата треба да се предвидат и места за информативни паноа, безжичен интернет и други погодности за забава и престој.
Изработката на идејно архитектонско – урбанистичко решение за уредување на оваа плажа на Охридско Езеро претставува основа за натамошно уредување согласно современите туристички стандарди, како би можеле во текот на туристичката сезона да бидат подготвени сите предуслови за пречек на туристите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
