На полноќ почнува изборната кампања

На полноќ започнува изборната кампања за претстојните локални избори што ќе се одржат на 24 март. Кампањата трае 20 дена. На 23 март е изборен молк. По постигнувањето на политичкиот договор и прекинувањето на бојкотот од опозицијата, вчера Собранието го продолжи рокот за доставување кандидатски листи за советници и градоначалници до 8 март на полноќ од страна на регистрирани политички партии или коалиции.

Колкава ќе биде вкупната бројка учесници на овие локални избори се очекува да се знае откако ќе заврши овој рок, кој вторпат се продолжува.

Се очекува ДИК повторно да направи измени на роковникот, а исто така по потврдувањето на листите треба да се изврши жребување меѓу новопријавените кандидати. Според најавите од ДИК по првото продолжување на рокот кој беше до 3 март на полноќ, редните броеви на кандидатите кои доставија листи во законски предвидениот термин односно до 16 февруари остануваат исти, а единствената листа на кандидати ќе биде дополнета само со новопријавените кандидати.

Кандидатурите, според законот, треба да ги разгледа и Комисијата за верификација на фактите која треба да изврши проверка дали кандидатите за идни советници или градоначалници соработувале со тајните служби.

Локалните избори во Македонија ќе се спроведат во 80 општини и во Градот Скопје. Во избирачкиот список за гласање на локалните избори се запишани вкупно 1.743.403 избирачи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.