Рокот за регистрација на чамците истекува на 3 септември

Вкупно 137 барања за регистрација на чамци на Охридското Езеро се поднесени согласно новиот Правилник за внатрешна пловидба на охридската Капетанија. Од нив, 95 се веќе прегледани и се очекува наскоро да добијат решенија. Крајниот рок за регистрација на пловните објекти истекува до 3 септември, соопшти министерот за транспорт и врски Миле Јанакиески, кој денеска ја посети Капетанијата.

– Не планираме да го пролонгираме рокот, бидејќи се работи за многу едноставна процедура која не е скапа. Ги повикувам сите оние кои тоа досега не го сториле, да поднесат барање до Судот за легализација на чамците – рече Јанакиески, нагласувајќи дека институциите очекуваат околу 200 барања до крајниот рок.

Горан Устијаноски, раководител на Капетанијата на пристаништата во Охрид, рече дека состојбата со водниот сообраќај во езерото е на задоволително ниво, а инспекторските служби посветуваат внимание на секој пловен објект.

– Засега немаме поголеми проблеми при спроведување на тие инспекциски контроли, а оние прекршоци кои досега ги имаме изречено се во рамките на очекуваното – рече Устијаноски.

Јанакиески, кој денеска е во работна посета на Охрид, се интересирал и за ефектите од воведувањето на чартер бродската линија Охрид – Поградец, при што од надлежните добил информации дека досега во осум тури на оваа линија се превезени 630 патници.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.