Пронајдени 15 парчиња неексплодирани бомби и мини во североисточниот дел

Од почетокот на годинава на подрачјето на североисточниот регион надлежните од подрачното одделение на Дирекцијата за заштита и спасување пронашле петнаесет парчиња неексплодирани убојни средства и мини.

Најголем број од парчињата – 7 се пронајдени на територијата на општина Куманово, најчесто во селата. По три парчиња пронајдени се на подрачјата на општините Липково и Кратово. На подрачјето на Старо Нагоричане,годинава пак пронајдени се два парчиња.

– Најчесто, жителите наоѓаат неексплодирани рачни гранати и бомби кои се скриени во старите згради на подрачјето на руралните места. Во Липково, последнава година пронајдени се парчиња од воениот конфликт од 2001, претежно неескплодирани гранати и рачни бомби, додека во останатите општини кои ги покрива подрачното одделение на Дирекцијата, се наоѓаат парчиња од Втората светска војна. Во Крива Паланка пак најчесто се наоѓаат парчиња од Првата светска војна – информира Гоце Илиќ, пиротехничар со речиси 30 годишно искуство, од подрачното одделение на Дирекцијата за заштита и спасување.

Граѓаните коишто пронаоѓаат, за нив непознати парчиња, вели Илиќ, веднаш треба да јават на бесплатните телефонски броеви 192 или 195 и не треба да приоѓаат кон местото. Веднаш се излегува на местото и се утврдува за каква направа станува збор, објаснува пиротехничарот Илиќ.

Пронајдените парчиња претходните години се уништуваа кај Зебрњак,а последниве години на полигонот во Криволак каде се уништуваат заедно со пронајдените неексплодирани парчиња од останатите региони на државата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.