Бенитес е пред отказ, Абрамович ги „пикира“ Мурињо, Хејнкес и Клоп

Рафаел Бенитес, менаџерот на Челси е блиску до отказ, а главни кандидати да го заменат се Жосе Мурињо и двајцата Германци, Јуп Хејнкес и Јирген Клоп.

Поразот од Манчестер сити, вчера, само го забрзува заминувањето на сегашниот менаџер, кој не се снајде на клупата на Челси и збогувањето е неминовно, тврдат англиските медиуми. Прашање е само дали рускиот сопственик на „сините“ од Лондон, Роман Абрамович, ќе има трпение до крајот на сезоната или наскоро ќе му врачи отказ на Бенитес.

Неуспесите кај актуелниот европски првак зачестија, па логичен расплет ќе биде заминување на менаџерот. Најавите на медиумите од Островот, велат дека Жосе Мурињо е главен кандидат за нов тренер. Остра конкуренција на сегашниот кормилар на Реал Мадрид, за кам-бек на „Стемфорд Бриџ“ се двајцата Германци, Јуп Хејнкес и Јирген Клоп. „Специјалниот“ ги знае сите тајни на Челси, бидејќи порано го предводеше клубот. Главен адут на Хејнкес и Клоп се одличните резултати на Баерн и Борусија Дортмунд . Јуп со Баерн, гази се пред себе во Бундеслигата, и веќе направи огромна разлика пред конкурентите, од цели 17 бода по само 23. кола. Баварците се и на прагот на четвртфиналето во Лигата на шампионите, што е супер препорака за Хејнкес. Тој и најави дека си заминува од Баерн по завршувањето на сезоната. Се знае и дека ќе го наследи Пеп Гвардиола, кој беше пик број еден на Абрамович, за позицијата шеф на стручниот штаб на Челси, но го претрка Баерн.

Клоп е еден од најуспешните млади тренери во Германија. Многу умешно ја предводи фудбалската машинерија на Борусија Дортмунд и тој е еден најбараните фудбалски стратези во моментов. Лани ги одведе „милионерите“ до титула во Бундеслигата, а успесите продолжуваат и оваа сезона. Борусија има реални шанси за пробив во октетот најдобри во ЛШ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.