Македонскиот писател со интернационално реноме, Јордан Плевнеш, ректор на Универзитетот за аудиовизуелни уметности, ЕСРА Париз-Скопје-Њујорк, е добитник на највисокото признание на Министерството за култура на Бугарија – „Златен век, Св. Кирил и Методи“, кое се доделува на денот на Св. Кирил и Методи, Апостолите на словенската писменост. Ова високо признание досега го добиле само пет добитници од Европа. Наградата му е доделана за неговото уметничко творештво, за неговата мисија во доближувањето на балканските култури и за градењето на духовните мостови помеѓу Бугарија и Македонија.
На свеченоста, којашто денес (23 мај 2014) беше приредена по тој повод, со присуство на врвни имиња од бугарскиот јавен живот и култура, меѓу кои актерите Рени Врангова и Стојан Алексиев, режисерот Александар Морфов и академскиот сликар Светлин Русев, во свечената сала Колегиум, наградата ја додели министерот за култура на Р. Бугарија, Петар Стојанович.
Претходниот ден Плевнеш беше гостин на Интернационалниот театарски фестивал во Враца, каде што претседателот на Фондацијата „Балканика“, Николај Стојанов, го промовира второто издание на драмата „Р“ од Плевнеш, која е играна во 30-тина земји во светот. Во рамките на фестивалот на интернационалната работилница на агенцијата Нета беше промовирано и неговото ново драмско дело „Св. Кирил и Методи 11-века подоцна“, кое со актери од 10-тина словенски земји ќе биде изведено 2015 година на интернационалниот театарски фестивал во Букурешт.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
