Македонија, конечно, освои златен медал во карате на Европско првенство, а јунакот е 22-годишниот штипјанец Емил Павлов. Со пет победи над врвни натпреварувачи во кумите, нашиот репрезентативец се искачи на највисокото место на подиумот во Тампере. Емил ги надмина сите проблеми, се мачеше непосредно пред шампионатот со скршеница на носот, но на крајот успеа и стана првиот Македонец со златен медал во овој спорт. Пред него Наташа Илиевска во 2011 година стана европска шампионка во Цирих
Емил Павлов е новиот македонски херој и освојувач на златен медал во карате на континенталниот шампионат што се одржа во финскиот град Тампере. Подвиг за паметење на 22-годишниот штипјанец, кој само две седмици пред ЕП мака мачеше со повредата на носот. Успеа да ја санира скршеницата и во блескав стил, со пет победи, да го освои златниот медал, со што стана првиот Македонец со злато во карате.
Во категоријата до 60 килограми пред Емил ничкум паѓаа Един Муслиќ од БиХ, потоа Швајцарецот Јаник Фаес, па Софијан Агудџил од Франција и швајцарскиот претставник Џефри Беренс, а финишот беше феноменален. Европската круна е освоена со победа од 6-2 во финалната борба против Данецот Каспер Лидегард. Павлов со освоениот златен медал стана спортист од светска категорија и од државата Македонија во следните четири години ќе добива месечен паричен надомест од две просечни плати. По завршувањето на кариерата и доживотна спортска пензија.
Со пет победи и, како што велат финските медиуми, на импресивен начин ја освои европската титула. Што беше клуч на успехот во Тампере?
Во последниот период учествував речиси на сите посилни турнири и бев во самиот врв според пласманот. Победував и светски познати имиња, носители на медали од големите натпреварувања, што ми влеа надеж и ми ја крена самодовербата дека можам да постигнам значаен успех и на Европското првенство. Со макотрпна работа, со огромна желба за добар резултат и, секако, со добар план што го подготвија моите тренери , успеав да стасам до златниот медал. Вербата во сопствените квалитети беше клуч на успехот во Тампере.
Која борба беше најтешка?
Францускиот претставник Агудџил беше еден од фаворитите на шампионатот. Беше изедначено, 2-2, но успеав да ја минам и таа пречка во четвртфиналето. Потоа сѐ одеше полесно, а победа над фаворит, каков што беше францускиот каратист, секогаш ви дава дополнителен елан. За среќа, во финалето брзо поведов против Лидегард и не дозволив да ми ги загрози победата и златниот медал.
Изненадување ли е што еден Македонец се искачи на врвот на Европа во категоријата до 60 килограми и како реагираа ривалите?
Според мене, не беше изненадување, а според реакцијата на ривалите, секако, да. Имаме одлична генерација каратисти и време беше и еден Македонец да го освои врвот на Европа. Работиме одлично и сигурен сум дека наскоро ќе има нови успеси и медали и во категоријата до 60 килограми, но и во другите категории. Имаме таленти што со напорна работа и добра стратегија можат да бележат врвни резултати. Европската титула е само почеток.
Кој е следниот предизвик?
Го пробивме мразот во Тампере, а титулата е мошне значајна за мене и за македонското карате. Ми дава сила и верба во сопствениот квалитет и затоа велам дека ова е само почеток. Постарите со право велат дека е полесно е да се стигне до врвот, отколку да се одбрани. Но, јас ќе продолжам напорно да работам, трофејот нема да ме опие, туку е само дополнителен стимул во мојата натамошна кариера. Се чувствувам позрел, поискусен и подготвен сум за новите предизвици. Ќе треба напорно да се тренира, а следниот голем настан на кој ќе учествувам е Светското првенство во Бремен, Германија, во ноември. Сега и ривалите ќе гледаат поинаку на мене и затоа ќе треба да се биде максимално подготвен за тежок турнир, за големи искушенија. Се надевам дека ќе бидам на потребното ниво во Бремен бидејќи тоа, сепак, е посилно натпреварување, на кое ќе учествуваат најдобрите каратисти на планетата.
Штипјани се горди на шампионот, но се славеше и во Тампере. Колку ти значеше поддршката од трибините во Финска бидејќи и таму имаше свои навивачи?
Прекрасно е кога ќе погледнеш кон трибините и ќе забележиш дека имаш поддршка, дека те бодрат навивачи. Специјален момент за мене е кога заедно со Македонците ја пеевме нашата химна. Морам да им се заблагодарам и на моите колеги од репрезентацијата, кои ме бодреа постојано на патот до златниот медал. Сите, заедно со Македонците што живеат во Финска, ми дадоа крилја да издржам и да стигнам до убав успех. Морам да ги споменам и моите тренери Жарко и Сашко Арсовски и селекторот Петар Белистојановски, кои многу ми помогнаа со совети за да стигнам до златото. Да не беа тие, можев само да сонувам за ваков успех.
По Тампере, Павлов во топ 3 на светската ранг-листа
По шампионатот во Тампере, новиот европски првак ќе напредува на светската ранг-листа и ќе направи скок од петтата позиција кон врвот. Пред него на рангирањето пред ЕП беше украинскиот каратист Олег Филипович, кој загуби во четвртфиналето и, сигурно, ќе биде зад Павлов на новата листа.
Третопласиран беше Бразилецот Даглас Брос, а разликата не е голема меѓу него и македонскиот шампион, па постои можност Емил да се пробие и на третата позиција.
Во Тампере на турнирот во категоријата до 60 килограми учествуваа и второрангираниот Лука Мареска од Италија и Беренс и Агуджил, кои се во топ 10 на светската ранг-листа, што доволно говори за квалитетот на натпреварувањето и за тежината на медалот на Павлов.
Тој стана вториот македонски каратист со златен медал, по Наташа Илиевска, која во Цирих пред три години го освои првото место на ЕП во категоријата до 55 килограми.
Каратистите жнеат медали
Иво Цветковски, Наташа Илиевска, Ардита Исени, Берат Јакупи, Огнен Груевски и Емил Павлов се носители на медали од европските првенства, што го прават каратето еден од најтрофејните спортови во Македонија. Имаме убава традиција од минатите времиња, што продолжува со нови медали и успеси.
Иво Цветковски во 2007 година во Братислава го освои сребрениот медал во категорија до 65 килограми, низата ја продолжи Илиевска, која стана европска првенка во категорија до 55 килограми во Цирих во 2011 година, а две сезони претходно во Загреб освои и сребро. Медали жнееја и Исени Ардита во Талин, Естонија, во 2008 година, кога освои бронза во конкуренција на најдобрите каратистки во Европа тешки до 60 килограми. Огнен Груевски беше бронзен во Атина пред четири години во категоријата на борачи до 84 килограми, а потоа на победничкиот пиедестал се искачи и Берат Јакупи. Тој се закити со бронзен медал во Унгарија во категорија до 84 килограми, лани на ЕП, а низата со медал со златен сјај ја продолжи Павлов во Тампере. Тој го освои европскиот врв победувајќи ги сите пет противници во категорија до 60 килограми.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
