Со подобра инфраструктура до поголема трговската размена меѓу Македонија и Косово

За околу 38 отсто минатата година е намален извозот на македонски производи во Косово во споредба со 2012 година, информираше денеска претседателот на Стопанска комора на Македонија, Бранко Азески.

Најголемо намалување, како што нагласи тој, има кај извозот на нафтените деривати, металната и прехранбената индустрија.

Со цел зголемување на економската соработка меѓу двете земји, денеска е потпишан Меморандум за соработка меѓу Стопанската комора на Македонија и Стопанската комора на Косово.

Целта на договорот е промовирање на натамошниот развој и зајакнување на постојната соработка во областите од заемен интерес, заради заедничко унапредување на работата на коморите.

– Централна точка во меморандумот секако е подобрување на инфраструктурата на која што веќе се работи, подобрување на меѓуграничните процедури и секако заемното информирање на компаниите, кое како што проценивме дека не е на задоволително ниво – истакна Азески.

Додаде дека за таа цел, во наредните шест месеци Стопанската комора на Македонија и ќе испрати свој претставник во Приштина, а Стопанската комора на Косово свој претставник во Скопје, кои ќе бидат задолжени да го зголемат нивото на информации и едукација за пласирање на македонски производи на косовскиот пазар, и косовски производи на македонскиот пазар.

Двете комори во иднина ќе организираат и заеднички манифестации, кои ќе ја поттикнат трговската размена меѓу Македонија и Косово, но и со други земји.

– Имаме голем предизвик а тоа е да го надоместиме губитокот на ОКТА на косовскиот пазар и ќе се фокусираме на тоа, а максимално ќе вршиме притисок да се олеснат процедурите косовските производи полесно да стигнуваат на нашиот пазар – посочи Азески.

Освен Меморандумот за соработка меѓу Стопанските комори на Македонија и Косово, денеска беше официјализиран и Договорот за соработка со Стопанската комора на северозападна Македонија.