Четири реваншни натпревари од осминафиналето во Лигата на шампиони ќе се одиграат денеска и утре. Вечерва на програмата се два натпревара, актуелниот европски првак Баерн Минхен со предност од 2:0 ќе го пречека Арсенал, како и Атлетико, кој во Мадрид ќе го пречека Милан, со минимална предност од 1:0.
Францускиот стратег Арсен Венгер најави дека неговиот тим нема да се предаде на реваншниот дуел од осминафиналето во Лигата на шампионите против Баерн Минхен.
– Знаеме дека можеме да победиме во Минхен бидејќи тоа го направивме минатата година. Имаме квалитет и желба, а со добра игра верувам дека можеме да успееме. Мораме да бидеме фокусирани на натпреварот и полека без нервоза да играме. Би било одлично ако први постигнеме погодок, но тоа нема да биде пресудно – вели Арсен Венгер.
– Секако дека е добро што имаме предност од два гола од првиот натпревар и имаме голема шанса да се пласираме во наредната рунда во Лигата на шампиони која во овој момент ни е побитна од Бундес-лигата. Нема да го браниме резултатот од првиот натпревар туку повторно ќе одиме на победа. Очекувам од моите играчи во овој меч да дадат сѐ од себе и да играат како да е во прашање финале – изјави тренерот на Баерн, Пеп Гвардиола.
Милан вечерва ќе излезе со една цел на теренот, да дојде до победа и поволен резултат кој ќе ги однесе понатаму, но Диего Симеоне изјави дека, исто така, оди на победа.
– Милан има одлични играчи и од сите можете да очекувате многу. Балотели е доминантен, но има тука уште многу играчи кои можат доста да направат. Тие поради резултатот од првиот меч ќе мора да го побараат патот до нашиот гол, а ние ќе пробаме да ги спречиме. Битката ќе се води на средина на теренот. Мораме да обратиме внимание на нивните брзи играчи и доколку успееме нив да ги сопреме, ќе преживееме – изјави Диего Симеоне.
– Тоа ќе биде отворен натпревар, тие имаат предност од првиот меч, но ние ќе влеземе како таа да не постои. Ги гледав неколку пати оваа сезона Атлетико и знам дека се работи за добри фудбалери. Подготвени сме за тешка борба. Ние едноставно мораме да постигнеме гол, атмосферата на стадионот не нѐ загрижува, подготвени сме за таков натпревар – вели тренерот на Милан, Кларенс Сидорф.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
