Бурано – најживописен остров на светот

Бурано е остров на северниот дел од венецијанската лагуна, оделечен од Венеција само 40 минути возење со брод. Како и секој остров, има душа и харизма, а уште од римското време на овој остров главна дејност е рибарството, но и уметноста на изработка на тантела. Но, најголема атракција на островот се неговите разнобојни куќи кои го прават островот еден од најживописните во светот.

Бурано го основале Римјаните што се селеле од страв од налетот на варварите и градот го именувале по еден од своите поранешни градови. Во почетокот куќите ги граделе од плетени трски, но со време ги замениле со куќи од тула, кои почнале да ги бојат во светли и итензивни тонови, што подоцна станало и заштитен знак на островот.

Не се знае точната причина поради која жителите почнале да ги бојат куќите во светли бои, но постои приказна дека рибарите се решиле на тој потег од едноставна причина – наутро, кога се враќале од ловење риба, низ густата магла да ги препознаат своите домови.

Ако некој сака да ја пребои куќата, прво мора да испрати барање до локалната власт, која потоа решава дали таа одредена боја, навистина, одговара на тој дел од островот каде што се наоѓа куќата. Иако островот е населен уште од шестиот век, тој станува интересен за другите кога жителите почнуваат да ја изработуваат тантелата, која ја везат со игли.

Тантелата многу брзо станала главен извозен производ на Италија во Европа.

Денес тантелата уште се произведува, но, за жал, само мал број жени ја изработуваат на традиционален начин и затоа е многу скапа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.