Во Кавадарци и во Лозово во градоначалничката трка ќе учествуваат дури тројца независни кандидати. Трајче Георгиевски, Слободан Јовановски и Горанче Велков ги собрале потребните потписи за изборите во општина Лозово, а Зоран Бојковски, Борис Давидов и поранешниот градоначалник Панчо Минов за Кавадарци. Тројца заинтересирани имало и во Битола, но еден од кандидатите не успеал да собере потписи. Таму како независни ќе настапат Зоран Лазаровски Паљо и Јорго Огненовски.
Како што веќе информираше „Република“, потписи за локалните избори собраа и поранешните членови на СДСМ, Виктор Цветковски како независен кандидат за градоначалник на Куманово, а Димитар Бузлевски на Ресен.
Освен, Цветковски и Бузлевски од поранешите членови на СДСМ, потписи собраа и Михаел Младеновски за советот на општина Центар, Ташо Радњански за Кавадрци, а Зоран Ставовски за советот на Охрид.
Од попознатите имиња, сопственикот на згаснатиот неделник „Сведок“ Томо Аврамски не успеал да собере доволно потписи за градоначалничката трка во Берово.
Според податоците на ДИК, поголема е заинтересираноста на независните за трката за советници, отколку за градоначалници.
Од вкупно заинтересирани 36 независни кандидати за градоначалници, 29 успеале да собрат потписи, а двајца се откажале. За советите на општините има пријавено дури 100 листи на кандидати за советници.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
