Кон крајот на март или почетокот на април Охрид ќе добие постдипломски студии по филмско сценарио на англиски јазик во рамките на Академијата за филмска и телевизиска уметност – ФАМУ, објави „Охрид прес“.
Дипломата од ФАМУ на дисперзираните студии во Охрид ќе биде идентична како и таа во Прага.
Според проценките на ФАМУ, во овој момент се најпотребни постдипломски студии по филмско сценарио, а планот е потоа постепено да се воведуваат и постдипломски за режија и фотографија…. На академијата ќе може да се запишуваат и студенти од странство, па се очекува таа да стане регионален центар на ФАМУ за едукација во филмската уметност.
Македонија е прва земја со која ФАМУ склучува ваков тип соработка. Идејата е од 2008 година, а почна да се конкретизира со неодамна потпишаниот меморандум со Министерството за образование и наука за соработка за формирање мешовит тим. Меѓу другите, во него ќе бидат вклучени актуелниот декан на Академијата во Прага Павел Јех и македонскиот режисер Иво Трајков, кој е професор на ФАМУ и амбасадор на македонската култура во Чешка.
МОН и ФАМУ соработуваат три години во кои 11 македонски студенти добија стипендии за студирање на познатата филмска академија – четворица за додипломски и седум за втор циклус студии, од кои тројца и ги завршија.
ФАМУ е основана во 1947/1948 и е петта најстара филмска школа во светот. Од неа произлегле познати имиња во филмот и литературата, како Милош Форман, Милан Кундера, Јиржи Менцл, Вацлав Хавел, Лордан Зафрановиќ, Емир Кустурица.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
