Венизелос во ЕП бара менување на македонскиот Устав

Шефот на грчката дипломатија, Евангелос Венизелос, пред Комисијата за надворешни работи на Европскиот парламент за недавањето датум за почеток на преговори со Македонија ја обвини „државната идеологија во земјата и односите со соседите, посебно со Бугарија“, јавува Дојче Веле .

Тој пред Комисијата за надворешни работи на Европскиот парламент ги претстави приоритетите на грчкото претседателство со ЕУ, а што се однесува до Република Македонија, изјави:

– Случајот со Македонија ќе биде разгледуван без дискриминација – нагласувајќи дека веќе двапати се сретнал и разговарал со министерот за надворешни работи на Македонија во Брисел и во Њујорк.

Ја посочил и средбата со лидерот на ДУИ.

– Имав контакти и со господинот Ахмети, кој е лидер на албанската партија, дел од владејачката коалција, чија партија е умерена. Ние ќе продолжиме да имаме односи со земјата и се согласуваме дека во името на земјата треба да има географска одредница. Станува збор за име кое ќе дозволи негово користење на внатрешен и на надворешен план.

Понатаму грчкиот министер за надворешни работи призна пред европратениците дека не е лесно да се смени уставот за да се прифати една специфична одлука, но тоа може да се направи.

– Тоа е нерешено прашање (прашањето за името,н.з.), но сѐ уште се можни измени. Ние знаеме дека имаше промени на уставот. Во однос на земјата и почетокот на преговорите, тоа не е само прашање на името, туку прашање за почитувањето на критериумите од Копенхаген, правната држава – нагласи Венизелос.

На крајот, тој со обвинувања до македонските власти го оправда недавањето датум за почеток на преговорите со Македонија, за него причина се:

– Државната идеологија која е во сила во земјата во однос на другите земји, посебно кон Бугарија, потоа прашањата поврзани со вредностите на Европската унија или критеримуите кои земјата треба да ги почитува.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.