Собранието на Република Македонија во попладневниот дел од денешната работа по дневниот ред на 80-тата седница ја донесе одлуката за утврдување на процентот на зафаќање од вкупниот годишен приход на носителите на лиценци за вршење
на енергетски дејности за финансирање на работењето на Регулаторната комисија за енергетика (РКЕ).
Согласно одлуката, за финансирање на РКЕ ќе се одвојуваат по 0,043 отсто од вкупниот годишен приход на носителите на лиценци за вршење на енергетски дејности. Лани овој процент изнесуваше 0,037 проценти.
Собранието го усвои и финансискиот план на РКЕ за 2014 година. Претходно претседателот на Регулаторната комисија за енергетика Димитар Петров посочи дека во 2014 година РКЕ има зголемување на расходите зашто се планираат нови
вработувања во тековната година.
– Останатите трошоци се исти како и во 2013 година, појасни Петров. Во реплика пратеникот Реџаил Исмаили од ДУИ побара да се почитува правичната застапеност во РКЕ, на што Петров одговори дека овој принцип се почитува во Комисијата и
додаде дека околу 28 отсто од вработените се од помалите етнички заедници.
Пратеникот Јани Макрадули од СДСМ во своето обраќање рече дека РКЕ не е е независно тело. Обвини дека Комисијата не ги штити граѓаните и воопшто не води сметка за загадувањето во Скопје, како и дека не контролира дали топланите греат на мазут или на гас.
– РКЕ служи само да си подели К15 за вработените и не ги интересира што донесовме погрешна одлука за зафаќање на 0,043 отсто од вкупниот годишен приход на енергетските компани за 2013 година, наместо како што требаше за 2012 година, рече Макрадули.
Во реплика Петров истакна дека веќе ниту една топлана во Скопје не користи мазут за затоплување, туку сите работат на природен гас кој најмалку ја загадува животната средина. Панче Орцев од СДСМ рече дека РКЕ на енергетските компании им ги признава сите трошоци со цел да имаат поголем приход за да може Комисијата повеќе да зафаќа од
нивниот приход.
– Како регулаторно тело наместо да ги штитите правата на потрошувачите ги штитите енергетските компании, обвини Орцев и нагласи дека претеничките групи на СДСМ и НСДП нема да го поддржат финансискиот план на РКЕ за 2014 година.
Собранието без расправа ја донесе и Националната стратегија за заштита и спасување на Република Македониа за периодот од 2014 до 2018 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
