Светските писателски имиња Орхан Памук и Виктор Ерофеев утре во Скопје треба да ја примат меѓународната книжевна награда „Табернакул“, која се доделува вторпат. Во нивна чест издавачката куќа „Табернакул“ ги издаде книгите „Немиот дом“ и „Наивниот и сентиментален романописец“ од Памук и „Руска убавица“ и „Акимудија“ од Ерофеев.
Доделувањето на наградата ќе се одржи утре, во 20 часот, во новиот објект на Македонскиот народен театар, на кејот на Вардар. Оваа меѓународна книжевна награда е под покровителство на Владата на Македонија.
Планирано е на доделувањето на наградата беседа за Памук да одржи Ферид Мухиќ, а Венко Андоновски треба да говореи за творештвото на Ерофеев.
За наградата на турскиот писател Памук, добитник на Нобеловата награда во 2006 година, и за рускиот автор Ерофеев донесе одлука одборот за доделување на наградата во чијшто состав членуваат ланските добитници Милан Кундера и Љубивоје Ршумовиќ, потоа Ферид Мухиќ, Горан Стефановски, Венко Андоновски и Цветан Враживирски.
Наградата подразбира објавување книга од наградениот автор, која досега не била објавена кај нас. Исто така, вклучува и парична награда од 5.000 евра, како и златник со името на добитникот, кој, всушност, е членска карта за влез во Книжевната академија „Табернакул“.
– Орхан Памук и Виктор Ерофеев се новите реперни точки на културната мапа, која секојдневно ја доцртуваме, реперни точки, кои во исто време се темели на невидливи палати низ кои само може да се мине, а не може да се урнат, ленгери на бродови, кои се закотвиле да истражуваат по темното и неодгатливо дно на душата. Доделувањето на оваа награда сакаме да биде и еруптивна побуна против општиот пад на моралот и против темелните вредности, димензија што е неопходна денес, во овој компјутеризиран вител што голта – изјави Враживирски на објавувањето на добитниците на наградата.
Елизабета Канческа-Милевска, министерката за култура, изјави дека меѓународната книжевна награда „Табернакул“ претставува промоција на светски книжевни авторитети на македонски јазик, но, што е поважно, и промоција на македонскиот јазик, култура и идентитет.
– Со еден збор – промоција на Македонија во светот. Затоа, со исклучителна радост ја поздравуваме и поддржуваме оваа идеја на „Табернакул“, за која, сигурни сме, еден ден ќе говориме како за неодминлива македонска културна традиција – изјави Канческа-Милевска.
Писателите треба да добијат и скулптура, која е дело на академскиот вајар Горан Стаменков.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
