Вашингтон изрази поддршка за приемот на Македонија вo Европската Унија, во својата прва реакција по одлуката на Советот на Европската Унија, каде Грција повторно го спречи отворањето на преговорите за членство, јави дописникот на МИА од Вашингтон.
Портпаролката на американскиот Стејт департмент Мери Харф рече дека САД ги поддржуваат интеграциите на Македонија и на Албанија, земјите кои не добија датум за отворање на преговори на Европскиот Совет.
– САД остануваат посветени на поддршката на земјите кои имаат евроатлански аспирации, вклучително и на Македонија и Албанија. Со задоволство го очекуваме денот кога овие земји целосно ќе се интегрираат во европските институции, што ќе ги продлабочи и нашите односи и партнерство со нив, изјави Харф, на прашање на МИА за
заклучоците на Европскиот Совет.
Во Вашингтон деновиве се одржуваат и консултации на помошникот државен секретар на САД за Европа Викторија Нуланд со генералниот секретар на грчкото Министерство за надворешни работи Анастасис Мициалис.
Предвидено е главна тема на разговорите да бидат грчките планови за првите шест месеци на 2014 година, кога оваа земја ќе го држи ротациското претседателство со Европската Унија. Грција, која го блокираше отворањето на преговорите за Македонија, најави поддршка за Србија, па и за Албанија, во нивните интеграции.
Стејт департментот воедно ја поздрави одлуката преговорите со Србија да се отворат во 2014 година. Харф изјави дека САД ќе ја поддржуваат и Србија во спроведувањето на реформите кои и се потребни за интеграциите во ЕУ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
