Осумнаесет годишен ученик од средно училиште во градот Сентениал, во американската сојузна држава Колорадо вчера се самоуби откако отвори оган во кругот на училиштето.
Како што јави дописникот на МИА од Вашингтон, во својот напад, ученикот Карл Пирсон ранил уште една соученичка. Во текот на нападот, Пирсон влегол во училиштето вооружен со пушка, одејќи по ходниците и барајќи еден од учителите. Учителот веднаш побегнал од училиштето, потоа велејќи дека се надевал дека Пирсон ќе појде по него, а подалеку од другите ученици.
Во еден момент за време на инцидентот, Пирсон пукал во 15 годишна ученичка, и тешко ја ранил. Во меѓувреме, учителите и полицијата забрзано го евакуирале училиштето. На крајот на инцидентот, Пирсон се самоубил.
Соучениците велат дека Пирсон бил агресивно момче и им се заканувал на соучениците и на учителите. Тој бил и коментатор на социјалните мрежи, каде пишувал пораки со критики против Републиканската партија.
Градот Сентениал, каде се случи нападот, како дел од метрополата Денвер, е десетина километри оддалечен од градовите Аурора и Литлтон, местата каде беа извршени два големи вооружени напади. Во Литлтон во 1999 година двајца ученици убија 10 соученици и еден учител, додека минатата година во Аурора, душевно болен напаѓач застрела 12 посетители на
премиерата на најновиот филм од серијалот Бетмен. Нападот во Сентениал се случи еден ден пред годишнината од крвавиот напад во училиште во градот Њутаун во Масачусетс, каде душевно болно лице уби 20 ученици и шест вработени.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
