И струмички „Комуналец“ исплаќал суми на фирмата каде сопственик станал братот Заев

И струмички „Комуналец“ давал тендери на фирмата во која сопственик станал братот на Зоран Заев, објавува Нетпрес.

Не само Општина Струмица, туку и струмичкото јавно претпријатие „Комуналец“ потпишувалo договори и исплаќалo големи суми на фирмата „Сара јавор инжинеринг“ во која подоцна станал сопственик Вице Заев, брат на струмичкиот градоначалник и лидер на СДСМ, Зоран Заев. Документи од Бирото за јавни набавки откриваат дека фирмата „Сара јавор инжинеринг“ направила две зделки со „Комуналец“ во вкупна вредност од над 700 илјади денари.

Она што е интересно е дека претпријатието наместо да објави еден оглас за набавка и превоз на сепариран песок, тоа објавило два огласи делејќи ја јавната набавка на еднакви вредност од 354 илјади денари. Ова било сторено со единствена цел да не се објавува тендер и да може набавката директно да ѝ биде доделена на фирмата „Сара јавор инжинеринг“.

Во моментот на потпишување на договорите во мај 2012 година, фирмата е сопственост на Горан и Симеон Крстев. Познато е дека Горан Крстев е близок соработник и косопственик на Вице Заев во две фирми „Дравас инжинеринг“ и „Сара инжинеринг“.

Најверојатно, откако тргнал бизнисот и со „Сара јавор инжинеринг“ и добивањето договори од струмичките јавни претпријатија и Општина Струмица, Вице Заев решил да стане дел и од оваа фирма. Така во јули годинава, на местото на Симеон Крстев, како сопственици на „Сара јавор инжинеринг“ се запишуваат Вице Заев и Митко Љочев.

Пред повеќе од еден месец беше обелоденето дека Општина Струмица во 2011 година склучила договор со „Сара јавор инжинеринг“ во вредност од 348 илјади денари за тампонирање паркинг-простор пред Градската капела во Струмица.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.