Јаневски: Најважно е да видиме каква ни е формата

Воопшто не е важно како ќе почне новата 2013 година од резултатски аспект. Важно е да имаме квалитетно издание кое ќе им влее самодоверба на фудбалерите. Ова го изјави Чедомир Јаневски, селекторот на фудбалската репрезентација на Македонија на денешната прес-конференција пред утрешниот пријателски меч со Данска на Арена „Филип Втори“ во Скопје.

– Секако сакаме 2013 година да ја почнеме резултатски добро но и со квалитетно издание кое ќе им влее нова самодоверба на фудбалерите во пресрет на мартовските дуели со Белгија. Ги одработивме првите тренинзи на овој собир и може слободно да кажам дека играчите горат од желба за ново докажување и позитивен резултат – рече Јаневски.

Тој не планира воопшто да се менува нашиот стил на игра во однос на дуелите од минатата година. Данска е одбрана за оваа контрола со оглед на сличниот начин на игра со селекцијата на Белгија.

– Нема ништо да менуваме во стилот на игра. Нема да има поголеми промени од дуелот со Словенија, со тоа што сега се враќа Горан Пандев кој сигурно ќе биде стартер. Ќе бараме победа на оваа средба, вистинско надигрување на теренот – иако е јасно дека не чека тежок противник – додаде селекторот на сениорите.

Капитенот на македонската репрезентација, Горан Пандев по пауза од три натпревари повторно е во националниот дрес и тој не го крие задоволството од новиот предизвик за себе и соиграчите. Најдобрите македонски фудбалери за противник ја имаат една од најдобрите европски селекции, без разлика што се работи само за контролен дуел.

– Среќен сум што повторно сум репрезентацијата, и што веќе е јасно дека имаме одлична атмосфера во пресрет на продолжението на квалификациите“ – рече Пандев.

– Данска е навистина голем тест за нас. Воопшто не се намалува тежината на средбата поради тоа што се работи за контролен натпревар. Јасно е дека посакуваме позитивен резултат како дополнително би се добило позитивен импулс за следниот квалификациски натпревар против Белгија – додаде најдобриот македонски фудбалер.

Капитенот на националите заедно со Агим Ибраими, Иван Тричковски, како и Адис Јаховиќ се очекува да биде офанзивната наша линија за утрешната средба со Данска.

Според Јаневски, Данска има искусен стратег кој го сменил нивниот досегашен начин на игра.

– Не го негуваат повеќе оној скандинавски или англиски стил, но технички фудбал со многу додавања кој е во функција на одличните индивидуалци во нападот. Но, без разлика на тоа, ние не се оптоваруваме со нив туку најважно во моментов ни е да видиме ние каде сме со формата“ – заврши Јаневски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.