МВР стави клуч на вратата на Музејот на Македонија, се стега обрачот околу вработените

По две седмици исчекување вработените да ги избројат исчезнатите предмети и да ја поправат евиденцијата, МВР денеска стави клуч на Музејот на Македонија во обид да ја засили истрагата и да ги примора учесниците во криминалот да признаат каде се однесени златните артефакти, објави „Алфа“.

Откако полициските инспектори, тврдат во МВР за Алфа, забележале дека вработените немаат намера искрено да зборуваат за бројот на предметите, за времето кога исчезнале и за тоа кој од нив кога изнесувал предмети, од денеска сите активности ги ставиле под контрола. За почеток ги затворија сите приоди до зградите на Музејот. Обезбедувањето и полицијата имаат задача да не пропуштаат никого и не упатија да снимаме само од непрегледни точки. На полицијата и помагаат инспектори од министерството за култура и Управата за културно наследство.

Кустосите пак на Музејот во писмената реакција до медиумите нагласуваат дека соработуваат со полицијата и дека до сега е утврдено дека недостасуваат 121-но парче, исклучиво златен накит од четири збирки. Пописните комисии констатирале дека украдениот материјал бил избран затоа што оштетениот не бил однесен. Секое користење на предметите од страна на кустосите се запишува, а нив ги надгледува ракувачот на депото кој води смета за предметите и евентуалните недостатоци.

При последниот попис во 2009-тата, но и до 2013-та кога биле правени каталози, сите предмети биле во депото. Пред еден месец за прв пат некој забележал дека ги нема и пријавил.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.