Парите го вртат фудбалот – гигантите заглавија во канџите на обложувалниците

Коцката е фрлена вели старата латинска фраза, а со неа одлично се отсликува опасната офанзива на обложувалниците и нивниот очигледен продор во фудбалските клубови. Тоа стана тренд, од кој нема враќање назад. Окупацијата е сѐ позасилена, па прашањето е дали необичната „љубов“ меѓу клубовите и обложувалниците е сосема легална.

„Бет 365“, „Пади Пауер“, „188БЕТ“, „Бвин“ и уште многу други обложувалници се спонзори на фудбалските клубови, голем дел од нив и на реномираните гиганти од калибарот на Реал Мадрид, Јувентус, Милан, Манчестер јунајтед, Арсенал, Баерн Минхен….

Реал Мадрид против Милан, дерби под капата на УЕФА, но и на „Бвин“

Дерби во Лигата на шампионите пред две сезони во рамките на групата Г беа дуелите меѓу Реал Мадрид и Милан. Играат два гиганти што оставиле длабока трага во историјата на фудбалската игра, но на теренот, барем според дресовите, меѓусебе играа членови на едно исто семејство. Обложувалницата „Бвин“ ги обединува гигантите со логото на дресовите во бела боја, која е карактеристика на „кралскиот клуб“ од Мадрид, и тие во црвено-црна боја, што се заштитен знак на Милан. Иста обложувалница ги спонзорираше двата ривали, што е чуден редослед на настаните. Има ли тука простор за манипулации, за евентуални нефудбалски работи. УЕФА организира, „Бвин“ спонзорира, клубовите играат на теренот, а обложувачите страдаат. Барем така велат луѓето што ги посетуваат обложувалниците и трошат огромни суми за обложување на фудбалските натпревари.

– Фудбалот и клубовите се во канџите на агресивните обложувалници и затоа сѐ почесто има чудни, дури и неверојатни резултати на фудбалските натпревари. Договорот меѓу најголемите клубови и обложувалниците, според сите норми, би требало да биде забранет. Вака секогаш е можно да се намести резултат во корист на обложувалниците, односно на спонзорите на тимовите, а на штета на тие што се обложуваат на фудбалските натпревари. Тука треба остро да реагираат ФИФА и УЕФА, но, очигледно, тие се немоќни или не сакаат да ги санкционираат клубовите – вели еден од пасионираните обложувачи во македонските обложувалници.

Двата гиганти моментно имаат нов спонзор, а и Реал и Милан на дресовите го имаат логото на „Флај Емирејтс“.

Само за потсетување, познатото мото на светски реномираните куќи е дека обложувањето е џентлменски однос на две страни – организаторите и обложувачите. Новиот тренд на спонзорирање на фудбалските клубови ги става обложувалниците во супериорна позиција во однос на тие што ги трошат парите кај нив. Можат ли да се контролираат и резултатите на фудбалските натпревари на релација обложувалница – клуб? Особено ако се партнери, или имаат спонзорски договор.

Резилот е голем, но љубовта продолжува во затскриена форма

Резилот е голем, притисокот врз клубовите, но и кон ФИФА и кон УЕФА постојано расте, па сега во помалку очигледна форма продолжи љубовта меѓу фудбалските клубови и обложувалниците. Повеќето екипи што на дресовите ги носеа логоата на обложувалниците ја променија тактиката. Повторно имаат договор со партнерите, но на дресовите го немаат нивното лого. Срамот беше очигледен, теоретски и ФИФА, и УЕФА, и клубовите, и фудбалските федерации водат битка против местенките, а, од друга страна, екипите носат дресови со имиња на обложувалници. Неодржлива ситуација. Се борите против злото што го промовираат клубовите на своите дресови и рекламни кампањи. Затоа „Бет клик“ си замина од Јувентус, „Бвин“ го нема на дресовите на Реал Мадрид и на Милан, „188 БЕТ“ не игра во Севилја…

Но, да нема дилеми, моќните компании што организираат обложувачки игри останаа во клубовите како партнери. Во Премиерлигата, која е најатрактивна, барем според интересот на обложувалниците за спонзорство, секој клуб си има свој обложувачки партнер. И тоа, што е уште поинтересно, голем дел од екипите имаат посебни спонзори од Англија и посебни на глобално ниво, претежно од Азија.

Арсенал има договор со „Пади Пауер“ како реномирана обложувалница на британскиот остров и со азискиот партнер „Бодог“. Ливерпул игра со „Пади Пауер“ и со „188БЕТ“. Манчестер јунајтед го има за партнер „Бвин“, а од Азија веројатно допрва ќе дојде заинтересирана обложувалница за договор со „црвените ѓаволи“.

А, само Стоук, Астон Вила и Фулам од сите англиски премиерлигаши си ги рекламираат своите спонзори од светот на обложувањето на дресовите. Стоук има договор со „Бет365“, тимот од Бирмингам игра со „Дафабет“, а Фулам на дресовите го има логото на „Маратонбет“.

– Фудбалот и обложувањето се како макарони и сирење. Тоа секогаш оди заедно, а разбирливо е што обложувалниците се заинтересирани за да се присутни во клубовите. Ако сакаат да зграпчат што поголем дел од обложувачката маса, јасно е дека им треба партнерство со реномираните екипи – вели во својата анализа спортскиот аналитичар Келвин Ејр.

Азијците во комплетна офанзива на стариот континент

Најагресивен продор во европските клубови, и тоа сосема очекувано, имаат азиските обложувалници. Парите се трошат немилосрдно, само за да се стигне до шанса да се спонзорираат гигантите од стариот континент. Азискиот пазар е огромен, континентот има најмногу жители и природно е да има огромен број обложувачи. И тука маркетиншки обложувалниците играат многу мудро. Се склучуваат договори со англиските клубови кои се екстремно популарни во Азија, се плаќаат милионски суми за неколкугодишни договори, а обртот и профитот постојано растат. Дури има и повратен ефект, па англиските тимови сѐ почесто ангажираат фудбалери од Азија за да го кренат интересот на огромниот и мошне примамлив пазар.

– И англиските клубови играат мошне мудро. Сѐ почесто се ангажираат фудбалери од Азија, во некои случаи дури и квалитетот на играчот е неважен. Маркетингот, освојувањето на пазарот и интересот се пред сѐ. Кога имате Азиец во тимот или во поширокиот состав, тогаш расте и гледаноста на преносите, се зголемува цената на ТВ-правата, а со тоа клубовите се сѐ поинтересни и за обложувалниците. И тие гледаат шанса да се рекламираат на настани што привлекуваат милионска публика. Тоа се врзани садови што функционираат одлично – пишува Келвин Ејр во својата статија посветена на обложувањето.

Почетоците беа во 2009 година кога обложувалницата „188БЕТ“ плати 650 илјади фунти за реклама на дресовите на Виган, односно 750 илјади фунти за ист договор со Болтон. Сега цените се многу повисоки. Арсенал доби 10 милиони фунти од „Бодог“ за три сезони, и тоа во договор кој не ги обврзува да го носат логото на азиската обложувалница на дресовите. Од „Бодог“ знаат дека тоа може да им донесе милиони навивачи на Арсенал од Азија на нивните веб- сајтови за обложување, па договорот изгледа совршено практичен и профитабилен. На ист ефект се надеваат и од „Пади Пауер“, односно се надеваат дека Арсенал ќе им ја донесе ирската армија обложувачи од разни континенти.

Обложувачки трик – во Фарнборо играат Зидан, Пеле, Марадона и Меси

Одличен обложувачки трик направи обложувалницата „Пади Пауер“ во договор со нисколигашот Фарнборо. Го презедоа комплетното финансирање на клубот, го преименуваа стадионот во „Пади Пауер парк“, а патем и ги убедија играчите да ги носат презимињата на познатите фудбалери Зидан, Пеле, Марадона, Меси…. Тоа наиде на потсмев во медиумите во Велика Британија, секако и кај поголемиот дел од јавноста, но на маркетиншки план целта се остварува. Трикот е интересен и привлекува сѐ повеќе обложувачи на шалтерите и веб- страницата на „Пади Пауер“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.