Никола Рилкоски ќе го замени Борис Кондарко. Тоа е предлогот на СДСМ за нов претседател на ДИК. Рилковски беше пратеник во Собранието од редовите на СДСМ и важи за локален моќник во СДСМ во Охрид.
Како што објавија некои медиуми, повикувајќи се на информациите од охридската јавност, Рилковски својата позиција во СДСМ и блискоста со поранешниот градоначалник Александар Петрески ја искористил да вработи поголем дел од своето семејство на раководни функции во Охрид.
Токму во тој период неговиот син Наум Рилкоски, станал директор на гимназија „Св. Климент Охридски“ во Охрид, а другиот син Александар Рилкоски, бил вработен во Општина Охрид како комунален инспектор.
Неговиот сват Драган Пандески, татко на сопруга на синот на Рилкоски беше поставен за директор на „ЈП Гробишта“ во време на Александар Петрески и во моментов се соочува со кривична пријава за злоупотреба на службена положба.
Зетот од сестра на Рилкоски, Боро Шајн, беше директор на „ЈП Билјанини извори„, јавно претпријатие кое на скандалозен начин ги даде под концесија паркинзите во Охрид. За овој случај имаше доста полемики во Охрид како може доктор да биде поставен за директор на „ЈП за паркинзи и спортски објекти“.
Исто така Рилковски во времето на СДСМ изгради и зграда во луксузниот дел на Охрид на булеварот Туристичка, во која потоа беше сместен штаб на СДСМ.
Во периодот кога беше пратеник во Собранието ќе остане запаметен по инцидентот кој што го предизвика, кога фрлаше со шише и ја навредуваше својата колешка Светлана Јакимовска. Овој инцидент се случи во 2008 година на седницата на комисијата за мандатно имунитетни прашања, кога се одлучуваше за одземање на имунитетот на пратеникот Владо Бучковски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
