Думитреску го брани Даниел Георгиевски: Не е само Македонецот виновен за голот на Базел (видео)

Легендата на романскиот фудбал Илие Думитреску застана во одбрана на македонскиот репрезентативец Даниел Георгиевски откако десниот бек на Стеауа беше нападнат од тренерот Лаурентиу Регекампф дека е виновен за израмнувачкиот гол на Базел постигнат во 91. минута.

– Георгиевски беше во инфериорна ситуација соочен со двајца противници. Можеби требаше да остане на својата позиција, но во продолжението од акцијата го стигна ривалот. Не е виновен само тој, поголема грешка направи Ади Попа, кој требаше да им помогне на дефанзивците да се одбранат. Како и да е, вакви голови не смеат да им се случат на екипи од рангот на Стеауа, особено не во натпреварување во Лигата на шампионите – изјави Думитреску.

Неговиот став да застане во одбрана на Герогиевски, веројатно, нема да му помогне многу на десниот бек на македонската репрезентација да „преживее“ во Стеауа. Тој е на „пик“ на сопственикот Џиџи Бекали, а сега го налути и тренерот Лаурентиу Регекампф, кој го обвини Георгиевски дека е директен виновник за голот на Џовани Сио. Со неговиот погодок Базел се спаси од пораз, мечот заврши 1-1, а Стеауа драстично си ги намали шансите за пласман понатаму. Лидер во групата Е е Челси со 9 бода, Шалке има 6, Базел 5, а Стеауа е последна со 2 бода. До крајот на првата фаза во ЛШ има уште две кола.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.