Грција стравува историската неправда што му ја нанесе на македонскиот народ да не ѝ се врати како бумеранг и да не дојде до разбивање на систематски градената хомогенизација на грчкото општество. Затоа се толку детински децидни и неумоливи, вели професорката на Правниот факултет „Јустинијан Први“, Иванка Додовска, во интервју за новиот број на неделникот „Република“.
Професорката смета дека македонскиот народ кој досега доживеал вековни неправди до ден-денешен се соочува со истите пречки со што го ставаат под знак прашање цивилизацискиот напредок.
– Замислете, по речиси еден век од Вилсоновиот принцип за самоопределување на народите, ние треба некому да му докажуваме дали постоиме или не, тоа е не само нечуено, туку и надвор од секакво рационално објаснување! Токму затоа сметам дека нам како Македонци ни преостанува само да го поднесуваме овој притисок во безизлезната ситуација, која во моментов не може да се промени, и да не дозволиме ни надворешните ни внатрешните „добронамерници“ да нѐ разнебитат – вели Додовска.
Додовска во интервјуто зборува за ароганцијата на грчкиот премиер топката за интеграцијата на Македонија да ја препушти на Европската унија со што ги става во незгодна ситуација и пријателски настроените европски партнери, како и за главната порака, која, според неа, е содржана во писмото на Самарас до Груевски. Таа објаснува зошто македонските политички партии сѐ уште не се способни да договорат национален консензус за нашите црвени линии, и ја коментира улогата на Ахмети и на ДУИ во планот на меѓународната заедница за притисок врз Македонија за промена на името.
(Целото интервју можете да го причитате во неделникот Република кое е во продажба од денеска, 1 август)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
