Милевски: Вардар покажа дека можел подобро

-Вардар покажа дека може да игра многу подобро од она што беше демонстрирано во Букурешт. Мене ми е жал што голем дел од првиот натпревар не го одигравме на овој начин, затоа што сигурен сум дека во тој случај ќе имавме многу поинтересна пресметка. Во секој случај Стеауа е голем тим и секогаш ја казнува и секоја најмала грешка. Така беше и вечерва постигнувајќи два гола од наша деконцетрација. Ние, пак, не реализиравме неколку убави можности во второто полувреме, рече шефот на стручниот штаб на Вардар, Боби Милевски, задоволен од начинот на кој неговиот тим го одигра вечерашниот натпревар против романската Стеауа.

–Ни требаат повеќе мечеви од овој тип. За следната сезона планираме да договориме и одиграме повеќе тест натпревари со квалитетни европски противници, како што беше оној против Шалке 04, како начин за стекнување на поголемо неопходно искуство на нашите играчи. Во секој случај, сега го забораваме овој натпревар со Стеауа и веднаш се насочуваме со мислите на Суперкуп натпреварот со Тетекс од кој очекуваме да ја освоиме првата титула во новата сезона, додава Милевски.

Лауренциу Регекампф, тренерот на Стеауа оцени дека Вардар одиграл на повисоко ниво.-Вардар одигра добар натпревар. Можеби и не заслужи пораз, но тоа е фудбалот. Ние продолжуваме понатаму, одејќи кон целите да стигнеме до групите од Лигата на шампионите, додаде Регекампф.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.