Хоризонт Турново со активен резултат од Сплит

Македонскиот претставник во квалификациите за пласман во Лигата на Европа, Хоризонт Турново, загуби со 1-2 на гостувањето во Сплит против екипата на Хајдук.

Иако Хајдук беше фаворит, на теренот кој беше во лоша состојба, гостите беа поконкретни и создадоа повеќе шанси во текот на мечот.

Хајдук поведе во 9 минута по една нафрлена топка од десната страна. Стрелец на голот беше Бенцун, кој топката го погоди во главата и влезе во мрежата на Стојан Димовски. Ова не ги разочара гостите кои трпеливо ги градеа нападите и создаваа шанси за гол.

Пред крајот на првиот дел, играчот на Хајдук Куаси играше со рака во шеснаесетикот и судијата оправдано досуди пенал за Хоризонт.

Сигурен реализатор беше Дејан Блажевски на кој ова му е четврт реализиран пенал во досегашното учество во квалификациите за Лига на Европа.

Во вториот дел, тимот од Турново имаше повеќе од играта и создаде две идеални шанси. Балдовалиев со глава од десетина метри одлично биеше во долниот лев агол на голманот Калиниќ, домашниот чувар на мрежата со прекрасна интервенција го спаси својот гол.

Само 4 минути подоцна Дејан Блажевски откако одлично се ослободи од противничкиот играч, излезе сам пред голот на Хајдук и од 16 метри биеше само неколку сантиметри покрај леватата статива од голот.

Откако не успеаа да ги реализираат шансите, нашите фудбалери во 79 минута по една мешаница пред голот на Турново, топката се одби до Малоча кој биеше прецизно под пречката и го постави конечниот резултат 2-1 за Хајдук.

Реваншот во Скопје се игра на 25 јули и со ваква игра екипата од Турново може да се надева на пласман во следната рунда и извонреден успех во дебито во фудбалска Европа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.