Мицкоски се сретна со претседателот на ЕПП, Џозеф Дол (видео)

Претседателот на ВМРО-ДПМНЕ, Христијан Мицкоски ја пренесе својата загриженост за лошиот правец во кој се движи државата на економски и политички план, на Џозеф Дол претседателот на ЕПП, во рамки на самитот на Европската народна партија.

На состанокот Мицкоски го информираше претседателот на Европската Народна Партија, господинот Дол, за актуелните случувања во Република Македонија, за тешката економска ситуација во која што се наоѓа нашата земја, за негативните резултати кои што ги постигнува нашата земја, за отсуството на реформи.

-Слабеењето на економскиот стандард, политичкиот терор како и поделбите во општеството ги уназадуваат демократските капацитети на државата. Имаме една година на исклучително лошо владеење во кое граѓаните живеат полошо и ситуацијата е без изглед за подобрување-пренел претседателот на ВМРО-ДПМНЕ Христијан Мицкоски.

-Токму затоа ВМРО-ДПМНЕ планира и голем протестен собир на кој ќе се изрази револт од катастрофалното владеење, но и ќе биде преставена понуда и решенија за излез од ваквата состојба, но очекуваме и недвосмилена поддршка од сестринските партии и Европската народна партија- посочи на средбата претседателот на ВМРО-ДПМНЕ, Христијан Мицкоски.

Претседателот Мицкоски ја потенцираше улогата на ВМРО-ДПМНЕ во процесот на креирање на реформските закони, каде што ВМРО-ДПМНЕ влијаеше на подобрување на тие законски решенија, а раководејќи се од интересот на граѓаните и запазувајќи ја европската перспектива на државата.

Од страна на претседателот на Европската народна партија, Џозеф Дол беше поздравена и недвосмислено беше искажана поддршка за политиките на ВМРО-ДПМНЕ во Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.