Борис Дамовски до судот: Извадете ме од оваа мувла

На вчерашната јавна седница на Апелацискиот суд во Скопје се разгледуваше жалбата на одбраната на Дамовски на решението на Основниот суд Скопје 1 за продолжување на притворот.

Одбраната на Дамовски апелираше на почитување на одредбите од Европската конвенција за човекови права, на правото на слободата нa изразување и на загарантираното право на протест, пишува МКД.мк.

Одбраната уште еднаш потенцира дека сите законски услови за одредување притвор веќе се неважечки, затоа што осомничениот ниту може веќе да влијае на сведоците, затоа што наводното дело е сторено лани во април, а дека Борис Дамовски и натаму е во државата и дека никогаш не помислувал да избега. Одбраната понуди одземање пасош или некаква друга гаранција за одредување куќен притвор.

Во своето излагање пред апелациските судии Борис Дамовски изрази несогласување со образложението на обвинителството дека станува збор за некаков политички мотив во неговите наводни дела и рече дека единствениот мотив бил одбрана на суверенитетот и унитарниот карактер на Македонија, пишува порталот.

Второстепениот суд во најкус можен рок треба да донесе одлука дали ќе ја прифати жалбата на осомничениот Борис Дамовски да му ја укине мерката притвор и да му определи поблага мерка за определување на присуство во текот на истрагата или ќе ја потврди одлуката на првостепениот суд.

Борис Дамовски во судницата беше донесен со лисици, во придружба на шест полицајци и со две полициски комбиња.

Досега Апелацискиот суд ги одби жалбите на сите осомничени, освен на оперскиот пејач Игор Дурловски. Сите бараат да им биде укината мерката притвор и да им биде определена поблага мерка за обезбедување на присуство на осомничените за настаните во Собранието.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.