Пратеничката група на ВМРО-ДПМНЕ со честитка по повод Денот на државноста 8-ми Септември

Пратениците на ВМРО-ДПМНЕ и коалицијата „За подобра Македонија“ на сите граѓани на Република Македонија им го честита Денот на државноста 8-ми Септември.

– 8-ми Септември 1991 година е денот кога граѓаните на Република Македонија покажаа одлучност и храброст и ја остварија големата и повеќевековна идеја и аманет на нашите предци, а тоа е сите ние да живееме во своја слободна, суверена и независна држава. Во сите овие години на независност, Република Македонија се соочуваше со бројни предизвици, премрежја и искушенија, со негативни и позитивни процеси, но и со препреки и проблеми од кои сите ние извлековме поука и излеговме посилни, стои во честитката од пратеничката група на ВМРО-ДПМНЕ по повод Денот на државноста 8-ми Септември и се додава:

– Покажавме дека со заедничка волја, обединети и сложни сме посилни и може да постигнеме многу, но покажавме и дека заедничката иднина и просперитет е многу поважен од поделбите и несогласувањата. Затоа, нека овој голем ден за Република Македонија и сите граѓани ни даде сила и верба да продолжиме заедно да се бориме со сите предизвици кои што ќе застанат на патот на нашата држава бидејќи само на тој начин ќе ја зачуваме, одржуваме и продолжиме големата идеја за силна, слободна, суверена и независна Македонија. Нека ни е честит и вековит 8-ми Септември. Нека ни е вечна нашата татковина Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.