Испитувањата од две лаборатории каде што се направени анализите на серумот и крвта на двајцата пациенти кои починаа на Инфкетивната клиника потврдиле етиолошки агенс – Хантан вирус, изјави министерот за здравство Арбен Таравари.
Се работи за вирус кој е најчест причинител на акутни хеморагични трески со бубрежен синдром во овој регион, кој не се пренесува од човек на човек.
Таравари, кој ја извести јавноста преку видеобраќање од САД каде е во работна посета, нагласи дека се работи за подобрата варијанта на хантан вирусот кој, за среќа, не се пренесува од човек на човек, туку се пренесува само од глодари. Двајцата починати татко и син од гостиварското село Симница најверојатно го презеле вирусот преку храна движејќи се на терен каде имало глодари.
– Овој вирус спаѓа во групата на хеморагични трески. Меѓутоа е најдобрата, најлесната варијатна бидејќи нема трансмисивност од еден на друг човек. Состојбата е под комплетна контрола, истакна Таравари, нагласувајќи дека Министерството за здравство и Комисијата за заразни болести постојано ја следат состојбата и ги преземаат сите неопходни мерки.
Рече дека е направена комплетна дезинсекција, дератизација, дезинфекција на тернот каде што се движеле двајцата починати пациенти, а доктори од Клиниката за инфективни болести биле во Одделот за инфективни болести во Гостивар и им дале инструкции на лекарите и медицинскиот персонал.
Седумте пациенти коишто се хоспитализирани од Гостивар, кои биле во контакт со веќе починатите, се во добра состојба, без никаков ризик по нивниот живот.
Тараври соопшти и дека од почетокот на годинава до сега во Клиниката за инфективни боелсти имало и други четири пациенти кои биле инфицирани со овој вирус. Тие немале никакви последици, излекувани се и се во добра и стабилна состојба.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
