Плажата на смртта во Албанија – за еден месец се удавија 14 лица од Косово

Првиот месец од туристичката сезона во Албанија беше фатален за туристите од Косово, беа забележани голем број на смртни случаи на плажите.
Последната жртва е 35-годишен Албанец од Приштина, кој се удавил во морето на плажата Велипој во близина на Драч. Пред него, животот на плажите во Албанија го изгубиле уште најмалку 14 лица од Косово – пренесуваат приштинските медиуми.

На плажите во Драч и Велипој се случиле најголем број смртни случаи, а речиси сите жртви се од Косово.
Првата несреќа се случила на 21 јуни кога 63-годишна жена ја изгубила свеста и починала на пат кон болница. Седум дена подоцна почина и 73-годишен маж.
Случаите од давење во водите на морето продолжуваат, а дел од нив се предизвикани и од срцев удар. На плажите околу градот Валона четири лица починаа на 15 јули. Само неколку дена претходно, во близина на Драч за неколку минути се удавиле три лица.

Кон крајот на минатата недела во Валона почина и 15-годишно дете, како и уште едно постаро лице на 42-годишна возраст. Полицијата ги регистрира сите случаи, а во поголемиот број од нив медицинските интервенции не помогнале.

Се проценува дека моментно на плажите во Албанија има неколку стотици илјади туристи само од Косово.

Извор: Точка

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.