Организаторите на Ролан Гарос меѓу двете полуфиналиња на женскиот турнир и оддадоа посебна почит на српската тенисерка Ана Ивановиќ. Шампионката на Ролан Гарос од 2008 година, на крајот од мината сезона стави крај на својата тениска кариера, а од парискиот гранслем денеска и официјално ја испратија во спортска пензија.
Атрактивната тенисерка која со својот сопруг, германскиот фудбалер Бастијан Швајнштајгер се пресели во САД, признава дека не и е лесно без тенисот, но дека не жали за својата одлука да стави крај на кариерата.
– Не е лесно, тенисот беше целиот мој живот, но драго ми е што сега имам слобода. Почнав да играм тенис гледајќи ја Моника Селеш, сакав да бидам пример за младите како неа. Ми недостасуваат натпреварите, но и сега сум зафатена, патувам, но, по своја желба и распоред и тоа ми е драго за промена. Не се каам за одлуката што ја донесов – вели Ана Ивановиќ.
Од организаторите на Ролан Гарос, српската тенисерка доби оргинална благодарница за се што постигна во белиот спорт – врамен пресек на подлогата на која се игра парискиот гранслем.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
