Палермо чекор поблиску до Серија Б, Милан со реми кај фенерџијата по киксот на Донарума (видео)

Милан загуби значајни два бода во трката за излез во фудбалска Европа откако „росонерите“ попладнево ремизираа 1-1 на гостувањето против Пескара. Иако против себе го имаа еден од најслабите клубови во Серија А, фудбалерите на Милан не успеаја да ја оправдаат фаворитската улога, играјќи далеку под своите можности. Згора на тоа, трагичар беше голманот Донарума, кој прими почетнички погодок по само 12 минути игра кога дозволи една повратна топка да му мине крај ногата, директно во мрежата. Милан по примениот гол целосно се отвори, преку Пашалиќ стигна до израмнување, а најубавата шанса за победа ја пропушти Ромањоли, кој биеше само во дирекот од голот на Пескара.

За Палермо веќе нема надеж за опстанок во Серија А откако сицилијанскиот клуб загуби на домашен терен од Калјари со 1-3. Несторовски и Трајковски се појавија во стартниот тим на сицилијанскиот состав, но не успеаја да сторат нешто повеќе, Палермо по првиот дел имаше водство од 1-0, за потоа во вторите 45 минути да прими три гола и да претрпи нов пораз.

Бабакар му донесе триумф на тимот на Фиорентина на мечот со Болоња, додека Аталанта на гостински терен ја растури Џенова со 0-5, меч на кој Горан Пандев не влезе во игра за домашната екипа.

Резултати Серија А 30.коло:

Торино – Удинезе 2-2, Палермо – Калјари 1-3, Џенова – Аталанта 0-5, Киево – Кротоне 1-2, Фирентина – Болоња 1-0, Пескара – Милан 1-1.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.