СОС: Зад прислушувањето стојат Рама, Ренци и Заев под капата на Сорос (ВИДЕО)

Никулецот на политичката криза во Р. Македонија е во незаконското прислушување. Постојат сериозни индиции дека зад него стојат Еди Рама, Италијанецот Матео Ренци и Зоран Заев под капата на Џорџ Сорос, информираа денеска на прес конференција од граѓанското движење „Стоп Операција Сорос“.

-Ваквата конекција ја потврди и поранешниот претседател на Врховниот суд на Албанија, Крешник Спахиу, кој јавно изјави дека Еди Рама погрешно изиграл со Заев кој бил директно финансиран од Сорос и дека е познато дека Сорос го финансирал прислушувањето во Македонија, истакна Никола Србов еден од основачите на СОС.

Според  „Стоп Операција Сорос “ планот за незаконското прислушување бил креиран во Рим, а времето кога е направен коинцидира со престојот на Зоран Верушевски во Рим  каде во македонската амбасада бил одговорен за соработката со  безбедносните служи на Италија.

-Според италијанскиот закон, во Италија прислушување за потребите на државата вршат неколку приватни компании кои имаат склучено соработка со италијанските власти. Од целиот континент, само во Италија опрема за следење на комуникациите може да купат и правни субјекти со специјална дозвола од италијанската влада. Индициите водат кон тоа дека Џорџ Сорос ја финансирал целата операција , од набавка на опремата до креирање на снимките, рече Србов.

Тој посочи дека врската помеѓу Сорос и прислушувањето во Македонија ја зацврстува и  Споменка Лазаревска, сопруга на второосомничениот во „Пуч“ Звонко  Лазаревски .

Од СОС велат дека истите луѓе кои стоеле позади прислушувањето сега стојат и позади „Тиранската платформа“.

-Позади тиранската платформа стојат Еди Рама, Зоран Заев и Џорџ Сорос, додека албанските партии се само маша преку кои се спроведува планот на Сорос во Македонија. Крајната цел е уривање на унитарноста на Р. Македонија и создавање на бинационална држава која де факто претставува федерација, рече Србов.

ОД СОС велат дека и СЈО е дел од соросовите инсталации во Македонија кое има за цел да ги амнестира сите актери кои ја создадоа кризата, а да ги дисциплинира сите неистомисленици.

Тие ги потсетија македонските институции да покренат истрага за улогата на „Фондацијата отворено општество“ и да испитаат каква е нејзината улога во државата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.