Во Охрид и денеска граѓани преку марш низ улиците на градот ја изразија својата поддршка на иницијативаta „За заедничка Македонија“, изразувајќи ја својата загриженост за иднината на државата и за зачувување на унитарниот карактер на Република Македонија.
– Ние сме тука за зачувување на унитарноста на Република Македонија, нејзиниот Устав, грбот, знамето и химната, за отфрлање на сите платформи донесени однадвор, а насочени кон уривање на темелите на државата, рече Владо Дичоски во име на учесниците на протестот.
Славица Николовска потсети дека граѓаните веќе десетти ден се тука, собрани во одбрана на, како што истакна, „заедничка унитарна Македонија, држава уредена без албанска платформа изготвена во туѓа држава“.
– Секој ден се помасовно и помасовно граѓаните на Охрид на овие легитимни, демократски протести го искажуваат своето мислење. Народот тука покажува дека има свое мислење, да се бори за унитарноста на Македонија, рече Михајло Филев, учесник на протестот, кој преку медиумите упати повик до сите останати граѓани да застанат во одбрана на заедничката држава.
Учесниците на протестот се собраа на плоштадот кај охридската гимназија, по што се упатија низ улиците во централното градско подрачје до Градскиот плоштад.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
