Спектакуларното апсење во центаро на Битола вчера ги возбуди битолчани. Според информациите на МВР, вчера во 13.30 часот во СВР Битола, В.Б. (42) од Битола, вработен како полициски службеник во СВР Битола, пријавил дека истиот ден околу 12.30 часот за време на пауза во работното време, додека заедно со неговата сопруга М.Б., со нивното возило „цитроен“, се движеле по ул. „Пеце Матичевски“ биле пресретнати од автомобил „дачиа дастер“ во кое бил Д.С. (47) од Битола.
Д.С. застанал со возилото на пешачки премин пред возилото на В.Б., излегол и се упатил кон него, при што на висок тон му упатил пцовки и закани по животот. Полицискиот службеник веднаш излегол од возилото, се легитимирал и му дал усна наредба на Д.С. да престане со дејствието. Веднаш потоа Д.С. го фатил В.Б. за вратот и почнал да го дави, а потоа го турнал во возилото и повторно му упатил закани по животот. Д.С., исто така, се обидел да му го одземе службениот пиштол на полицискиот службеник, но не успеал. Во меѓувреме, сопругата на В.Б. се јавила кај друг полициски службеник, кој заедно со уште еден полициски службеник дошле на местото на настанот и му упатиле усна наредба на Д.С. да прекине со нападот. Откако не ги послушал се обиделе да го лишат од слобода, но бидејќи цело време давал активен отпор, не успеале. Кога пристигнале уште неколку полициски службеници Д.С. бил лишен од слобода и одведен во СВР Битола.
По извршениот разговор истиот бил пуштен на слобода. Против Д.С. ќе биде поднесена кривична пријава поради постоење основи на сомнение „напад врз службено лице при вршење работи на безбедноста”.
Истиот ден во 17.00 часот Д.С. дошол во СВР Битола и пријавил дека околу 12.15 часот се движел со неговиот автомобил „дачиа“, а кога стигнал на пешачкиот премин пред хотел во Битола застанал со цел да пропушти пешаци. Во тој момент поминувал возач, кој управувал со „цитроен“ и почнал да свири по него и да му упатува пцовки, по што излегол од возилото, ја отворил вратата на „дачиата“, го извлекол Д.С. од возилото, извадил пиштол, го репетирал и му го вперил во главата, велејќи му дека ќе го убие.
Според пријавителот Д.С. тоа бил В.Б., полициски службеник од СВР Битола, кој не се легитимирал.
СВР Битола презема мерки за целосно расчистување на случајот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
