Во Штип во тек е протестот на граѓанската иницијатива „За заедничка Македонија“ – Илинден Четврти. Протестот почна од соборниот храм Свети Никола, по што продолжи по улиците во централното градско подрачје покрај реката Отиња.
Во моментов учесниците на протестот се кај кружниот тек кај зградата на Стопанска банка, каде што граѓаните говореа дека се против воведувањето на двојазичноста, поделбата на Македонија и разнебитувањето на државата.
Миа Ефремова претставник од граѓанската иницијатива „За заедничка Македонија“ –Илинден Четврти рече дека како млад човек нема ништо против различностите, но, како што рече, не на овој начин со затворени врати, со одлуки за промени кои не се во полза за иднината на младите во Република Македонија.
– Иако сметам дека различностите не зближуваат и треба да ја градиме својата иднина заедно, сепак сме граѓани на Република Македонија и не смееме да дозволиме ова да ни се случува и да останеме индеферентни, како младина, која се бори за сопствените права и сака да ја продолжи својата иднина во ова држава, рече Ефремова.
Во Штип протестите на „За заедничка Македонија“ се одвиваат мирно и без инциденти, а граѓаните велат дека за протестите дознале на социјалните мрежи и самоиницијативно учествуваат во нив.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
