Најмалку 48 загинати во нов терористички напад во Багдад

Најмалку 48 луѓе загинаа, а неколку десетици други се ранети денеска при експлозија на автомобил бомба во јужниот дел од Багдад. Претставник на локалната болница соопшти дека дел од ранетите луѓе се наоѓаат во критична состојба.

Безбедносни извори информираа дека автомобилот бомба експлодирал на улица на која имало повеќе продавници за стари возила во населбата Хај ал Шурта.

Одговорност за овој најсмртоносен напад во Багдад од почетокот на годинава, презеде џихадистичката група Исламска држава (ИД).

Групата зачести со извршување терористичките напади ширум Ирак по засилувањето на воздушните напади на авионите на антиџихадистичката коалиција врз нејзините позиција и по почетокот на офанзивата на ирачките сили за освојување на градот Мосул, кој е последен голем град во Ирак под контрола на ИД.

Ова е втор напад во Багдад во последниве 24 часа, откако вчера бомбаш самоубиец детонираше камионет бомба во багдадското предградие Садр, при што загинаа 15, а беа ранети над 50 лица.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.