Пандев беше стрелец за Џенова, но Лацио мина во четврфиналето од Купот на Италија (видео)

Во натпревар од осминафиналето на Купот на Италија, одигран на „Олимпико“ во Рим, фудбалерите на Лацио славеа победа против Џенова со 4-2, и се пласираа во четвртфиналето. На вчерашниот натпревар за гостите од првата минута настапи и нашиот Горан Пандев и ги одигра сите 90 минути.

Од самиот почеток фудбалерите на Лацио го диктираа темпото, а како резултат на таквата игра стигна и голот за 1-0, кој го постигна Ѓорџевиќ во 20. минута. Само осум минути подоцна шанса од пенал да зголеми имаше Андерсон, но биеше непрецизно. Во 31. минута Лацио преку Ходт поведе со 2-0. Сепак фудбалерите на Џенова не се предаваа и по головите на Пиниља во 41. и нашиот Пандев во 45. минута, на одмор заминаа со 2-2.

По паузата се играше рамноправно и без многу шанси, а во таквата игра фудбалерите на Лацио се чини го решија натпреварот во 5 минути. Најпрво во 70. минута водство од 3-2 донесе Милинковиќ-Савиќ, а конечните 4-2 ги постави Имобиле во 75. минута. Со постигнатиот гол на денешниот натпревар, нашиот Пандев стигна до бројката од 4 гола во Купот на Италија.

Во четвртфиналето фудбалерите на Лацио ќе се сретнат со тимот на Интер, кој дури по продолженијата ја совлада Болоња.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.