Суперзасилувањето на Севилја ја прекина серијата на Реал Мадрид (видео)

Екипата на Реал Мадрид го доживеа првиот пораз во Примера. Храбрата Севилја изненади на домашен терен и со пресврт во последните минути дојде до триумф над „кралевите“ од 2-1.

Јунак за клубот од Андалузија беше зимското засилување од Интер, Црногорецот Стеван Јоветиќ кој усешно стрелаше во мрежата на „кралевите“ во судиското продолжение од мечот за нова победа на својот клуб. Во два меча за својот нов клуб Јоветиќ постигна веќе два гола и тоа против ист противник бидејќи успеа да реализира и на куп-натпреварот пред пет дена.

Гостите од Мадрид го контролираа ритамот на игра за време на целата средба која не изобилуваше со шанси, но сепак, во финишот потфрлија и доживеаја неочекуван пораз.

Првиот погодок беше постигнат во 65. минута, кога судијата реши да покаже на белата точка откако голманот Рико стартуваше врз Карвахал. Ударот од белата точка го изведе Кристијано Роналдо, кој шутираше во небранетиот агол на голманот на домаќините.

Во продолжението од натпреварот избраниците на Сампаоли се изборија за комплетен резултатски пресврт. Изедначувањето го донесе Серхио Рамос, кој си даде автогол во 85. минута, додека „кралевите“ ги шокираше Стеван Јоветиќ, со гол во 92 минута.

По овој меч заврши неверојатната серија на Реал Мадрид од 40 натпревари без пораз. Со новите три бода Севилја му се доближи на само бод на Реал (40) на врвот на табелата. Барселона е на третото место со два бода зад лидерот.

Реал Мадрид има натпревар помалку, оној против Валенсија на Местаља.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.