Во терминот од 17.45 часот на Светското првенство во Франција се одиграа три средби. Фаворитите Франција и Шведска лесно извојуваа победи, додека Европскиот шампион Германија во дерби дуелот во неизвесна завршница ја доби Унгарија.
На мечот на кој на теренот беа нашите Начевски и Николов, како победници излегоа „панцерите“, кои го добија мечот со 27-23. Германија на крилата на Уве Генсхајмер тргна фуриозно во натпреварот и пред полувремето обезбеди највисока предност од седум гола (16-9), меѓутоа, Миклер се разбрани и во вториот дел ги врати Унгарците во игра. На пет минути пред крајот на семафорот стоеше 22-21, но Германија постигна голови преку Генсхајмер и Хафнер, со кои создаде комотна предност од три гола.
Најдобар ракометар во победничкиот состав беше Уве Генсхајмер, кој заврши како лидер со 13 гола од вкупно 15 обида, а го следеше Хафнер со седум гола. Кај Унгарците, дури шест ракометари постигнаа по три гола, а главната ѕвезда, Ласло Наџ, беше задржан на само еден гол од три обида. Пред финишот на мечот меѓу Германија и Унгарија црвен картон заработи Патрик Лигетвари од Унгарија.
Домаќинот на Мундијалот Франција, со убедливи 31-19 ја декласираше Јапонија. Иако на мечот влегоа и играа дури 45 минути без својот најдобар ракометар Никола Карабатиќ, Фрацузите ниту еднаш не дозволија Јапонците да бидат конкурентни. Во средината на вториот дел домаќинот имаше предност од 15 гола (29-14), а се што Јапонија успеа да направи до крајот беше да го намали поразот на 12 гола. За одбележување е атрактивниот цепелин на Јапонија, кој во погодок го претвори Џин Ватанабе.
Најефикасен ракометар кај Франција е Фабрегас со седум гола, а го следат Мае со пет и Гигу со четири, додек кај Јапонците, Кенто Уегаки даде пет гола.
Шведска, пак, очекувано го реши Бахреин (33-16). Во првиот меч на Швеѓаните на СП најмногу се истакна Толбринг Џери со 10 гола, а Захрисон додаде уште осум, додека кај аутсајдерите од Бахреин, Мохамед Хабиб Хасан беше автор на четири гола.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
