Никој не поднел досега приговор во ДИК

Ниту една политичка партија и коалиција досега, до 14 часот, не поднела приговор до Државната изборна комисија (ДИК) за гласањето, сумирањето и за утврдувањето на резултатите од неделните предвремени парламентарни избори, информираат од Комисијата.

Подносителите на листи на кандидати имаат право да поднесат приговори до ДИК за постапката за гласање, сумирање и утврдување на резултатите во рок од 48 часа по завршувањето на гласањето, односно 48 часа по објавувањето на првичните резултати.

Приговорите за постапката за гласање можат да се поднесуваат најдоцна до вечер до 19 часот, додека рокот за поднесување приговори за постапката за сумирање и за утврдување на резулатите истекува в среда, во три часот наутро.

ДИК е должна во рок од 48 часа по приемот на секој приговор да донесе одлука. Против одлуката на ДИК, подносителот на приговорот може да поднесе тужба до Управниот суд во рок од 24 часа.

Конечните резултати од предвремените парламентарни избори 2016 година, ДИК ќе ги соопшти веднаш, а најдоцна во рок од 24 часа по завршувањето на целата постапка по приговори.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.