Во што е тајната: Рамос пак го спаси Реал во последна минута (ВИДЕО)

Втор натпревар по ред во Примера Серхио Рамос го спасува Реал Мадрид. Една недела откако му обезбеди голем бод на Реал на гостувањето на „Камп Ноу“, овојпат дефанзивецот му донесе победа на својот клуб од 3:2 над Депортиво ла Коруња со постигнат гол во 92. минута.

Со видно изменет состав „кралевите” се обидоа да ја решат оваа задача и да го задржат првото место во шпанската лига, пред почетокот на активностите во светското клупско првенство.

Откако по првиот дел немаше погодоци, во продолжението по пет минути игра мрежата ја затресе Мората. Сепак, Хоселу во период од само две минути (63′, 65′) направи сензационален пресврт. Израмнувчкиот гол беше дело на Дијаз, додека Рамос донесе три нови бода. Сега Реал стигна до бројката од 37 и го задржа лидерското место по 17 одиграни средби.

Серхио Рамос уште еднаш се покажа како голем херој на Реал Мадрид на еден натпревар кога неизвесноста е актуелна до самиот крај, а изминатава ноќ тоа го направи на мечот со Депортиво Ла Коруња на кој постигна нов гол во самата завршница од натпреварот, односно во судиското надополнување.

Капитенот на Реал Мадрид ги понесе сите позитивни коментари по драматичната победа од 3:2, а по натпреварот се реши да открие во што се крие тајната за тоа што секогаш постигнува погодоци на крајот од натпреварите.

– Тајната е мојот менталитет. Едноставно тоа сум јас, мојот менталитет е тој. Се борам до самиот крај и тоа е она што ме носи во вакви ситуации. Целта ми е постојано да се подобрувам, да ги повторувам убавите работи и да му ги направам работите многу тешки на тој што ќе ме наследи. Знам дека ќе биде многу тешко да се надминат овие бројки, – истакнал по средбата капитенот на Реал.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.