Над 20.500 македонски државјани во странство ќе можат да го остварат своето право на глас на предвремените парламентарни избори закажани за 11 декември. Поради големиот број пријавени, ДИК вчера на седница одлучи во Берн, Швајцарија, да отвори три дополнителни избирачки места, а во Венеција, Италија уште две.
Првпат оваа година гласачко место ќе биде отворено и во Абу Даби, Обединети Арапски Емирати. Според информациите од ДИК, за гласање во Берн, Швајцарија, се пријавиле над 4.000 македонски државјани, додека во Венеција речиси 3.000. Гласачки места со над илјада пријавени во дијаспората има и во Детроит и Њујорк, САД, во Мелбурн, Австралија, и во италијанскиот главен град Рим. За дополнителните избирачки места допрва ќе се формираат избирачките одбори. Претседател и заменик претседател на овие избирачки одбори се вработени во амбасадите и дипломатскоконзуларните претставништва во земјите каде се отвораат овие места, а останатите членови се предложени од партиите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
