Сан Антонио реди победи, Вејд феноменален во победата над Бостон (видео)

Синоќа во НБА лигата беа одиграни четири натпревари. Најинтересни беа дуелите во Сакраменто и Чикаго во кои фаворитите не дозволија изненадувања.

Сан Антонио и на второто незгодно гостување стигна до победа, откако по Голден стејт, „спарси“ синоќа славеа и во Сакраменто со 94-102. По израмнетото прво полувреме, пресуди одличната одбрана на Сан Антонио во третата четвртина, во која „кралевите“ постигнаа само 13 поени. Избраниците на Попович целосно ја превзедоа контролата и на крајот заслужено триумфираа, а во главната улога беше Леонард со 30 поени и пет украдени топки. На „кралевите“ од Сакраменто не им помогна ниту одличното издание на Демаркус Казинс, кој оствари дабл-дабл од 37 поени и 16 скокови, сепак премалку за да се изненади Сан Антонио.

Чикаго булс стигна до триумф на домашен терен над Бостон селтикс, и тоа најмногу благодарение на Двејн Вејд и неговиот одличен шут од далечина. Екс-ѕвездата на Мајами постигна четири тројки од шест обиди, што е негов прв меч од регуларен дел од сезоната со повеќе од три реализирани тројки уште од јануари 2013 година. Гостите од Бостон од минус 14 стигнаа на само два поени разлика на една минута до крајот, но токму Вејд со својата четврта тројка ја осигура победата на „биковите“. Големиот ас го заврши мечот со 22 поени, два помалку од најдобриот стрелец Батлер, додека кај гостите Томас беше најефикасен со 25 поени.

НБА резултати:

Атланта – Вашингтон 114-99, Чикаго – Бостон 105-99, Сакраменто – Сан Антонио 94-102, Портланд – ЛА клиперс 106-114.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.